Малады Фронт.Нацыянальная ідэя - Хрысьціянскія прынцыпы: Інфармацыя /

СУД НАД МАЛАДЫМ ФРОНТАМ: 30 ТРАЎНЯ, 14:00, ЛАГОЙСКІ ТРАКТ,3

КРЫМІНАЛЬНАЯ СПРАВА СУПРАЦЬ МАЛАДОГА ФРОНТУ

4 лютага 2007 г. падчас Цэнтральнай Рады Маладога Фронту былі затрыманыя 28 рэгіянальных і менскіх лідэраў моладзевага нацыянальнага руху. У гэты ж дзень КДБ распачаў крымінальную справу ,паводле 193-1 КК РБ, супраць лідэраў менскага Маладога Фронту, Зьмітра Хведарука й Алега Корбана.

4-га лютага на кватэрах Насты Палажанкі, Зьмітра Хведарука, Алега Корбана й Аляксея Янушэўскага адбыліся ператрусы. Маладафронтаўцы Зьміцер Хведарук і Алег Корбан трое сутак знаходзілі ў турме КДБ, пасьля чаго былі вызваленыя пад падпіскі зьяўляцца на допыты й выклікі ў пракуратуру. Пасьля некаторага часу справа была перададзеная ў галоўную пракуратуру Менску сьледчаму Сяргею Грахоўскаму.

На працягу месяца па ўсёй краіне адбываліся допыты маладых людзей, якія праводзілі супрацоўнікі КДБ і раённых пракуратураў. Было дапытана каля некалькіх сотняў актывістаў. Пазьней ў стан падазраваных былі пераведзеныя сябры Маладога Фронту Наста Палажанка, Аляксей Янушэўскі й Барыс Гарэцкі.

Пасьля гэтага празь некаторы час на кватэрах, дзе прапісаны й дзе практычна жыве Барыс Гарэцкі адбыліся ператрусы. У Сакавіку ўсім пяці падазраваным у “дзейнасьці ад імя незарэгістраванай арганізацыі” былі прад’яўленыя абвінавачваньні. 4-га красавіка крымінальна справа Маладога Фронту была перададзеная ў Савецкі суд беларускае сталіцы. Незаконнае судовае паседжаньне будзе весьці судзьдзя Аляксей Таманаў. Паводле 193 – 1 арт. КК РБ, маладафронтаўцам пагражае тэрмін да 2-х гадоў пазбаўленьня волі.

Нагадаем, што па гэтым жа артыкуле быў пакараны на паўтары гады зьняволеньня ў мінулым годзе 25-ці гадовы лідэр Маладога Фронту, Зьміцер Дашкевіч. 8 траўня ўсе абвінавачаныя актывісты МФ былі выкліканы ў Савецкі суд г.Менску, дзе ім паведамілі дату палітычнае расправы над моладзевым нацыянальным рухам.

Суд адбудзецца 30-га траўня ў 14:00 у Савецкім судзе г.Менску (Лагойскі тракт, 3). Малады Фронт заклікае ўсім неабыякавых людзей прыйсьці на суд над маладымі беларускімі патрыётамі, каб разам супрацьстаяць дыктатарскаму рэжыму й спыніць рэпрэсіі супраць беларускае незалежнае моладзі!

ЗЬМІЦЕР ХВЕДАРУК

Нарадзіўся 5 сакавіка 1988 г. Скончыў гімназію № 11 г.Менску. Прафэсійна займаўся футболам. Граў за дублюючы склад футбольнага клюбу “Дарыда”, а таксама “Трактар” (сёньняшні "МТЗ - РІПА"). Цікавіцца беларускай гісторыяй і культурай. Актыўны ўдзельнік вулічных акцыяў апазыцыі. Неаднаразова затрымліваўся супрацоўнікамі КДБ, міліцыі й байцамі спэцназу. Шмат разоў адбываў шматлікія адміністратыўныя арышты за ўдзел у масавых акцыях. Трое сутак знаходзіўся ў турме КДБ. Пратэстант.

АЛЕГ КОРБАН

Нарадзіўся 4 лютага 1985 у Менску. Скончыў сярэднюю школу №22. Вучыўся у Міжнародным гуманітарным эканамічным інстытуце на юрыдычным факультэце. Выключаны з ВНУ за актыўны ўдзел у дзейнасьці Маладога Фронту. Цікавіцца беларускай гісторыяй і культурай. Працаваў на Менскім заводзе шасьцерняў, адкуль быў звольнены з-за ціску КДБ кіраўніцтва. Актыўны ўдзельнік вулічных акцыяў дэмакратычных сілаў. Неаднаразова затрымліваўся супрацоўнікамі КДБ і міліцыі. Неаднаразова адбываў арышты за ўдзел у масавых акцыях. Трое сутак правёў у турме КДБ. Праваслаўны.

НАСТА ПАЛАЖАНКА

Нарадзілася 2 жніўня 1990 у Менску. Навучаецца ў 10-ай клясе сярэдняй школы №73 з паглыбленым вывучэньнем нямецкай мовы. Займалася музычнай творчасьцю. У складзе гурту "Іншыя" удзельнічала ў адборачным туры на Басовішча-2004. Цікавіцца беларускай гісторыяй і культурай. Актыўна ўдзельнічае ў вулічных акцыях дэмакратычных сілаў. Неаднаразова затрымлівалася супрацоўнікамі КДБ і міліцыі. Праваслаўная.

БАРЫС ГАРЭЦКІ

Нарадзіўся 13 верасьня 1987 у Менску. Скончыў сярэднюю школу №121. Навучаўся ў Дзяржаўным політэхнічным каледжы на факультэце мікраэлектронікі. Адлічаны напярэдадні выбараў за удзел у акцыі пратэсту. Зараз вучыцца ў Беластоцкім ўніверсітэце на факультэце інфарматыкі. Сябра ініцыятыўнай групы А.Мілінкевіча, удзельнік акцыяў дэмакратычных сілаў. За свае погляды неаднаразова адбываў арышт на Акрэсціна. Цікавіцца беларускай гісторыяй і культурай, удзельнік асьветніцкага праекту "Шоў Беларушчыны". Хрысьціянін.

АЛЯКСЕЙ ЯНУШЭЎСКІ

Нарадзіўся 29 траўня 1987 г. Скончыў сярэднюю школу № 200 г. Менску. Паступіў у Беларускі дзяржаўны педагагічны ўніверсітэт на факультэт беларускай філялёгіі й культуры. Выключаны з ВНУ за актыўны ўдзел у дзейнасьці Маладога Фронту, акцыях і мерапрыемствах беларускай апазыцыі. Зараз зьяўляецца студэнтам Віленскага педагагічнага ўніверсітэта факультэта славістыкі. Цікавіцца беларускай гісторыяй і культурай. Актыўны ўдзельнік вулічных акцыяў апазыцыі. Неаднаразова затрымліваўся супрацоўнікамі КДБ, міліцыі й байцамі спэцназу. Грэка-каталік.