Сёньня адбылася прэссавая канфэрэнцыя, на якой сустаршыня "Маладога Фронту" Зьміцер Дашкевіч ад імя ўсіх удзельнікаў галадоўкі абвесьціў аб спыненьні гэтае акцыі.

Як патлумачыў сам Зьміцер, асноўнаю прычынаю спыненьня акцыі зьяўляецца рэзкае пагаршэньне здароўя яе ўдзельнікаў. Таксама адной з прычынаў ёсьць вельмі моцны ціск з боку спэцслужбаў на гаспадароў кватэры, у якой апошні тыдзень знаходзіліся ўдзельнікі акцыі пратэсту. На прэс-канфэрэнцыі прысутнічалі ўсе дзевяць чалавек, якія апошнімі ўдзельнічалі ў галадоўцы. Сярод іх была й Наста Азарка, якая ўчора была шпіталізаваная. Яна паведаміла, што адчувае сябе ўжо больш-меньш нармалёва.

Усе ўдзельнікі акцыі выказалі вялікую падзяку ўсім людзям, якія іх наведвалі, падтрымлівалі, усім журналістам, якія паведамлялі пра падзеі вакол гэтае акцыі, усім тым, хто на працягу гэтых цяжкіх трох тыдняў хваляваўся за яе ўдзельнікаў, усім вернікам хрысьціянскіх канфэсіяў, якія нягледзячы на рэпрэсіі выказвалі Салідарнасьць з тымі, хто змагаецца за праўду й свабоду свайго народу й маліліся за іх. Удзельнікі галадоўкі ўпэўненыя, што акцыя пратэсту дасягнула некаторых сваіх мэтаў. Моладзевая галадоўка за гэтыя 20-ць дзён атрымала вялікі грамадзкі рэзананс. На яе адгукнуліся вядомыя палітыкі й грамадзкія дзеячы Беларусі й іншых краінаў сьвету. Дзякуючы штодзённаму распаўсюду маладафронтаўцамі друкаваных матэрыялаў, прысьвечаных галадоўцы, грамадзтва даведалася аб тым, што ў Беларусі галадуе моладзь - будучыня гэтае краіны. Галадоўка, рашучы й мужны крок на які пайшлі маладыя людзі дзеля таго, каб жыць у свабоднай і цывілізаванай Беларусі, зьяўляецца галоўным доказам таго, што нашаю краінаю кіруе дэспатычная ўлада. Галадоўка - гэта яскравы прыклад таго, што Беларуская моладзь перамагла страх і абыякавасьць, якімі было прасычанае нашае грамадзтва. Моладзь узяла на сябе адказнасьць за лёс сваёй Бацькаўшчыны! А таму перамены ў сьвядомасьці людзей ужо непазьбежныя.

Нагадаем, што акцыя пратэсту была распачатая салігорскімі маладафронтаўцамі 29 траўня й працягвалася на працягу трох тыдняў. Агулам у акцыі ўдзельнічала каля 100 чалавек з усіх рэгіёнаў Беларусі. Ніякае афіцыйнае рэакцыі з боку уладаў акрамя пагрозаў , затрыманьняў і ціску на яе ўдзельнікаў не было.