На восьмы дзень правядзеньня моладзевай галадоўкі кіраўніцтва Маладога Фронту агучыла зварот з заклікам да ўсіх непаўнагадовых актывістаў спыніць свой удзел у гэтае акцыі.

Сябры!

Усе мы з захапленьнем назіраем за адчайнай акцыяй супраціву – моладзевай галадоўкаю, што пачалася ў Салігорску і праходзіць па ўсёй Беларусі, з патрабаваньнямі спыніць крымінальны перасьлед Маладога Фронту. Гэтая акцыя ўраджвае сваёй рашучасьцю і мужнасьцю, мы ўдзячныя ўсім, хто прымае ў ёй удзел.

Тым часам нас вельмі непакоіць стан здароўя непаўнагадовых удзельнікаў мерапрыемства. Мы ня можам браць на сябе адказнасьць за здароўе і жыцьцё самаахвярных юнакоў, каторыя не пабаяліся кінуць выклік аўтарытарнай беларускай сістэме. Таму, захапляючыся рашучасьцю і мужнасьцю моладзі, мы просім і заклікаем усіх непаўнагадовых галадоўнікаў спыніць свой удзел у гэтай акцыі.

Дзякуй вам за вашыя шчырыя і адданыя сэрцы!

Жыве Беларусь!

Сяржук Бахун, Барыс Гарэцкі, Зьміцер Дашкевіч, Дзяніс Карноў, Павал Красоўскі, Сяржук Лісічонак, Валеры Мацкевіч, Артур Фінькевіч, Зьміцер Хведарук.